په خوست او پکتیکا ولایتونو کې د پاکستان د هوايي ځواک بمبارۍ د افغانستان پر ځمکنۍ بشپړتیا تېری، د ټولو بین المللي موازینو څخه سرغړونه او پدې برید کې د بي دفاع وګړو وژل کېدل د بشریت ضد جنایت دی.
د پاکستان پوځ پداسې حال کې زموږ په خاوره بمونه غورځوي چې افغانستان یو مسوول او مشروع نظام نلري. سربېره پر دې په کابل او کندهار کې واکمنې ډلې له راولپنډۍ څخه سرچینه اخیستې؛ راولپنډۍ هغه ځای چې نن سهار ور څخه دغه وحشیانه هوايي بریدونه رهبري شوي دي.
د طالبانو په نوم پر افغانستان واکمنه نیابتي ډله نه یوازې دا چې د دې بریدونو د مخنیوي اخلاقی جراات نلري بلکې هیڅ یې اراده هم نلري. دا ځکه دوی د پاکستاني پوځ او د دغه پوځ د نړیوالو ستراتيژیکو متحدیدنو په زور افغانان یرغمل کړي او خاوره یې اشغال کړې ده.
سره لدې چې په اوسنۍ نړۍ کې فزیکي قدرت او زور لرل مهم دي، خو که یو هېواد مشروع ولسي دولت او د پرګنو ملاتړ ولري، هیڅ قدرت به ونشي کولای پر خاوره، خلکو او ځمکنۍ بشپړتیا یې داسې ښکاره برید وکړي. افغانستان دا مهال د همداسې یو ولسي مشروع دولت د نه لرلو له رنځه کړېږي. له همدې تشې څخه په استفادې د افغانستان تاریخي دښمنانو او نړیوالو قدرتونو زموږ خاوره د خپلو نیابتي جګړو په میدان بدله کړې ده.
د اکثریت له نظره د دې کړکیچ او غمیزې اصلي مسوولیت په کابل او کندهار کې د حاکمې ډلې او د دوی د ملي او بین المللي ملاتړو پر غاړه دی. موږ په دې اند یو چې تر څو چې په افغانستان کې یو مشروع او ولسي سیاسي نظام نه وي رامنځته شوی، افغانستان به دې یرغل ته ورته د ډېرو نورو بدو ورځو شاهد وي.
اکثریت سیاسي فکري ټولګه ده چې د ملي او ډموکراټیکو افکارو لرونکي ملتپال افغانان یې پر مخ وړي او د همدې ټولګې ګډ فکر منعکسوي.