پرې غزې د اسرائیلو د برید په اړه اعلامیه
Nov 7, 2023
د روان کال د اکتوبر په اوومه نېټه پر اسراییلو د حماس د جنګي ډلې برید اسرائیلو ته یو ځل بیا دا زمینه مساعده کړه چې پر فلسطین ړندې بمبارۍ وکړي. لدې سره دا یو ځل بیا ثابتېږي چې د حماس په څېر جنګي افراطي ډلې نه یوازې دا چې ازادي غوښتونکې او خپلواکه ندي، بلکې د مبارزې بڼه یې هم د کرهکتنې وړ ده. اوس ۳ اونۍ کېږي چې د اسرائیلو صهيونيستي رژیم د غربي هېوادونو په بشپړ سياسي، نظامي او مالي ملاتړ د فلسطيني ماشومانو، بوډاګانو او ښځو قتل عام، سلاخي او د کورونو او بازارونو ويجاړول پيل کړي دي.
پنځلس کاله پخوا د غرب په پټ او ښکاره ملاتړ په ډراماتيک ډول د غزې کنټرول د حماس لاس ته ورغی او د فلسطين د ازادۍ غورځنګ او ولسي خوځښتونه د غزې له تړانګې څخه باسي. څه موده وروسته د قطر په دوحه کې د حماس ډلې ته لکه د افغانستان د طالبانو په څير سياسي دفتر، مالي او مطبوعاتي حمايت ورکول کېږي.
حماس ته د غزې تر سپارلو وروسته د دې اټکل کېده چې د حماس غوندې يوې افراطي ډلې ته د فلسطينيانو برخليک سپارل، هغوی لا زيات د اسرائیلي ښکيلاک لاندې شکنجې ته را کاږي او اسرائيل او غربي ملاتړي يې په اسانۍ پر فلسطينيانو خپل ظلمونه توجيه کولای شي.
په غزه کې د روان وحشت تر ټولو تراژیديک اړخ دا دی چې ټوله نړۍ په ژوندۍ توګه ګوري چې د نړیوالو زبرځواکونو په لاسونو جوړ نړيوال قوانين، د جنګ اخلاق، بشري نورمونه او په نهایت کې انسانيت د تلويزيوني شبکو د کمرو مخې ته تر خاورو لاندې کېږي خو دوی يې مخه نه نیسي او مازې ننداره يې کوي.
سره لدې چې د غربي نړۍ د غير انساني او غير اخلاقي سياستونو ذات او ماهيت په اسلامي نړۍ کې اکثره ازادي بښونکو ملي غورځنګونو او يو شمېر وطپرسته افغانانو ته څرګند و، خو په غزه کې وروستي ناورين د دغو ټولو شيطاني قوتونو له مخې هغه انساني نقابونه هم لري کړل چې د درېیمې نړۍ د تېرايستلو لپاره به يې اچول.
موږ افغانان چې تېرو څلورو لسيزو کې د لويو قدرتونو په ځانګړي ډول د غربي هېوادونو د سياسي او پوځي مداخلو او د حماس په څير د هغوی د روزل شويو مذهبي افراطي ډلو قربانيان يوو، د فلسطین د خلکو درد او رنځ تر بل هر چا ښه احساسولی شو او د دغه روان بشري جنايت غندنه کوو. موږ په دې باور یو چې حماس، حزب الله، طالب، مجاهد او دې ته ورته ټولې افراطي جنګي ډلې په شلمې پېړۍ کې خپله د غرب پر مالي او استخباراتي ملاتړ رامنځته شوې او وروسته په ډېرو اسلامي هېوادو کې پر مسلمانو ولسونو په زور وتپل شوې. دغو ډلو اوس نه یوازې د خپلو مسلمانو ولسونو پر مرۍ پښې ایښې دي، بلکې پر غرب باندې د کوچنیو بریدونو له لارې، هغوی ته لار هواروي چې بیا د ترهګرۍ د مخنیوي او مبارزې په نامه خپل ځواکونه په ازادو ملکونو ورمارش کړي.
موږ هیله لرو چې په غزه کې د روان قتل عام مخه ونیول شي او په دا منځ کې د غربي دولتونو پر ځای د سیمې او نړۍ ولسونه د پرګنیز انساني سیاست له مخې په یوه غږ خپل دولتونه مجبور کړي تر څو جګړه ودروي. موږ هیله لرو چې نه یوازې د فلسطین او اسرائیل عام بېوزله وګړي د بشپړې ازادۍ نه برخمن شي، بلکې هره هغه خاوره چې غربي زبرځواکونو خپلې وژونکې وزرې پرې غوړولي، پخپله د خپل برخلیک د ټاکلو جوګه شي.