«اکثریت» سیاسي او فکري ټولګه په خېبر کې د اکتوبر په ۱۱مه نېټه د جوړېدونکې تاریخي پښتنې جرګې کلک ملاتړ کوي. دغه جرګه د پښتون ژغورنې غورځنګ په نوښت رابلل شوې. د غورځنګ مشر منظور پښتون د غورځنګ د نورو ملګرو سره په ګډو هلو ځلو د کوزې پښتونخوا ټولې پښتنې سیاسي ډلې، پښتانه ګوندونه، قومي مشران، ټولنې او سازمانونه هم دې جرګې ته رابللي. د جرګې موخه د پښتنو په سیاسي، ټولنیزو او بېلابېلو ستونزو باندې غږېدل دي چې پښتانه ورسره له لسیزو راهیسې مخ دي.
زموږ په باور، دا جرګه د پښتنو په تاریخ کې یوه له مهمو پېښو څخه ده چې په سیمه کې او په ځانګړي ډول د پښتنو پر خاوره د سترو قدرتونو په لاس رامنځته شويو جنګونو پر ضد غږ پورته کوي. دا جرګه د پښتنو د سیاسي شعور د ویښتابه څرګنده نښه ده چې د روان کړکېچ څرنګوالی پېژني او د هغې لپاره حللار لټوي.
جرګه له تاریخي پلوه د پښتنو په کلتور کې تر ټولو لوړ ټولنیز بنسټ دی چې ټول پښتانه ورته درناوی لري او پرېکړې یې برخلیک ټاکونکې وي؛ ځکه خو د جرګې په رانږدې کېدو د پاکستان د حکومت له لوري د پښتون ژغورنې غورځنګ غیرقانوني اعلانول زموږ لپاره د حیرانتیا وړ خبره نده، بلکې دا د پاکستان لخوا په رسمي ډول د هغه حقیقت منل دي چې دوی د پښتنو د مترقي سازمانونو سره ژوره کرکه او دښمني لري. له بله پلوه دا د پاکستاني پوځ مخ پر زوال حالت ښيي چې مراندې یې سستې دي او له یوه سولهییز خوځښت څخه دومره شدیده وېره لري.
سره لدې چې تر دې مهاله د دې جرګې لسګونه منتظیمن ځورول شوي او بندیان شوي، خو د جرګې د جوړولو لپاره ولسي اراده لا غښتلې شوې او څوک چې د قام په ننګه بندیان شوي په ولس کې یې درناوی او احترام لا زیات شوی. موږ دغه بندیز د غورځنګ لپاره یو فرصت بولو چې په پایله کې به یې د غورځنګ ملاتړ لا پراخ او پیاوړی شي.
موږ نه یوازې د جرګې ملاتړ کوو، بلکې باور لرو چې جرګه لا مخکې خپلې اساسي موخې ته رسېدلې ده. د غورځنګ لخوا د استعمار نیابتي پنجابي پوځ نیغ په نیغه ننګول، دغه پوځ د ترهګری د مور په توګه پیژندل، او د پښتنو د مختلفو قبیلو، مدني او سیاسي سازمانونو اعتماد او باور ترلاسه کول او د یو ټاکلي هدف لپاره په یو ځای راټولول، تر دې مهاله د دې جرګې لویې لاسته راوړنې دي.
لر و بر یو افغان!
د جرګې د بشپړ بربالیتوب په هیله!
«اکثریت» سیاسي فکري ټولګه ده چې د ملي او ډموکراټیکو افکارو لرونکي ملتپال افغانان یې پر مخ وړي او د همدې ټولګې ګډ فکر منعکسوي.