له پاکستان څخه د افغان مهاجرو په زوره راشړل
Oct 4, 2023
سره له دې چې پاکستان خپله د نړۍ والو ترهګرو ډلو لپاره امن پټنځای دی او په ځانګړې توګه په سیمه او افغانستان کې جنګېدونکو ټولو ترهګرو ډلو ته یې پناه ورکړې وه، اوس غواړي افغانان نړۍ ته د تروريزم د قربانیانو پځای تروريستان معرفي کړي
د پاکستان حکومت د ملګروملتونو د يو غړي هېواد په توګه د دغه سازمان د ټولو منل شويو نړيوالو کنوانسیونونو، نړيوالو قوانينو او د بشري حقونو د ټولو نورمونو خلاف پريکړه کړې ده چې ټول بي اسنادو افغان مهاجر، په زوره د طالبانو تر تسلط لاندې افغانستان ته را ولېږي.
د پاکستان حکومت دغه پريکړه نه يوازې د انساني ارزښتونو خلاف او د غندلو وړ ده بلکې د دغه هېواد او د دوی د لاسپوڅو جهادي تنظیمونو او طالبانو د هغه دوکتورينو يا روايت خلاف عمل هم دی، چې دا څلويښت کاله يې افغانانو ته د اسلامي اخوت او واحد بي سرحده امت په توګه پر افغانانو د تپلو کوښښ کاوه.
د پاکستان حکومت د لومړي ځل لپاره وروسته له هغې دا ګام اخلي چې د دوی نيابتي ډله په کابل واکمنه ده او فکر کوي نور يې افغان ګډوالو ته پخوانۍ ستراتيژيکه اړتيا کمه شوې ده.
په اوس وخت کې د افغان ګډوالو موضوع له را پورته کولو څخه د پاکستان موخه، نه يوازې د خپلو داخلي مشکلاتو څخه د خپلو معترضو خلکو توجه په بله اړول دي؛ بلکې د دې تر څنګ غواړي تېرو دوو کالو کې د پاکستان تر کنټرول لاندې سېمو کې د ټولو ترهګريزو پيښو پړه پر افغانانو واچوي.
پاکستان هڅه کوي افغانان د تروريزم د قربانیانو پځای تروريستان معرفي کړي. البته په کابل او کندهار کې د طالبانو ادارې په غير مستقيم ډول د شريعت په نامه د سختو قوانينو په وضع کولو پاکستان سره د دغه هدف په ترلاسه کولو کې مرسته کوي.
طالبان او د هغوی کورنۍ اکثره د پاکستان د تابعیت يا هم د مهاجرت اسناد لري، کورنۍ يې پاکستان کې ارامه ژوند او خپله کابل کې دندې لري، د پاکستان د دغه نوې پريکړې قربانيان د طالبانو له واکمنۍ څخه تښتيدلي افغانان دي چې اسناد نلري، د پاکستان دا پريکړه په يو ډول د طالبانو له ثبات سره مرسته ګڼل کېدای شي.
نن د پاکستان دغه منافقانه څيره ټولو ته رسوا کېږي چې څنګه يې شل کاله د اسامه بن لادن په شمول د طالبانو د کوټې او پيښور شوراګانو ته د پاکستان تر کنترول لاندې خاوره کې پناه وکړې وه، خو نن يو غريب بي اسنادو افغان مهاجر نشي زغملی ښځې، ماشومان او بوډاګان يې په محبسونو کې اچولي.
«اکثريت» د پاکستان د دغه نا انساني اقدام د غندلو تر څنګ د پښتونخوا د ولس، مدني ټولنې او هغه بنسټونو او سياسي تنظيمونو څخه مننه کوي چې پدې سختو شرائطو کې يې د پاکستان د جابر او ظالم رژيم خلاف غږ پورته کړی او د مظلومو افغان کډوالو تر څنګ دريدلي دي