د امريکا او افغانستان د سوداګرۍ خونې د پلاوي د سفر په اړه:
Sep 11, 2023
دا نوره هر چا ته ډېره څرګنده ده چې د طالبانو د کابل او کندهار اداره په هيڅ برخه کې ابتکار عمل، خپلواکي او اراده نلري. دا دوه کاله پدې تمه شپې سبا کوي چې له واشنګتن او قطر نه يو ښه خبر او فرمايش واوري. د طالبانو دغه ناڅرګند برخلیک حتا د دوی ملي او بين المللي لابيګران ناهيلي کړي دي. خو کابل ته د امريکا او افغانستان د سوداګرۍ خونې د پلاوي سفر د طالب چارواکو او د هغوی د لابيګرانو په رګونو کې تازه وينه وچلوله او له تېرو څلورو ورځو را هيسې د طالبانو په منځ کې د اميدوارۍ د تر ټولو غوړ خبر په توګه تبليغېږي.
تېرو دوو کالو کې طالبان تر بل هر چا له هغو هیوادونو، چې په اصطلاح دوی ورسره شل کاله جنګ کړی، په افغانستان کې د پانګونې، مرستې او لاسنيوي تمه کړې. همدا تېره ورځ د دوی د بهرنيو چارو سياسي معين شيرمحمد عباس ستانکزي بيا بيا په امريکا او د ناټو په غړو هېوادونو غږ وکړ چې بېرته افغانستان ته راشي او لدوی سره ګډ کار وکړي.
د طالبانو او د هغوی د غربي ملاتړو ترمنځ سياست داسې ډيزاين شوی چې ورو ورو به د طالبانو له پټ ملاتړ پرده پورته کوي او اخر کې په ښکاره يو د بل خوا کې دريږي. دد غه سياست په سلسله کې لومړی د جمهوريت پر مهال مشهور سياسي انجوبازان د غربي هېوادونو له غټو فنډونو سره کابل ته لاړل. ورپسې تېره ورځ د امريکا او افغانستان د سوداګرۍ خونې په چوکاټ کې لوی شمېر هغه سوداګر چې د ناټو د تيلو او بېلابېلو لوژیستیکي قراردادونو پر مټ شتمن شوي او د بېلابېلو قومونو څخه دي، کابل ته د امریکا په مرسته لېږل کیږي چې د تېر په څير خپلې سوداګريزې چارې طالبانو سره په شراکت پر مخ یوسي.
د ملا برادر په مشرۍ د اقتصادي کميسيون دنده همدا ده چې د پخواني با تجربه شرکت سره د طالبانو لخوا نوی تشکيل شوی شرکت ملګری او قرارداد ورکړي. بيا به ګټه په خپلو کې وویشي. لدې کار سره بسپنه ورکوونکي بهرنيان هم مشکل نلري او د هغوی پاليسي هم دا ده چې طالب مشران هم لکه د جمهوريت پر مهال جنګسالاران شتمن کړي. وروسته له دې به هغه طالب قومندانان چې دوه لسیزې په تور اقتصاد کې بوخت ول، د جمهوریت د قومندانانو په څېر شریفې څېرې خپلې کړي.
د «اکثريت» له نظره طالب سره ناست لوی شمېر سوداګر هماغه انجوبازان دي چې سلګونه کارکوونکي يې همدغو طالبانو وژلي دي. دا د هماغو امنيتي لوژیستیکي شرکتونو مالکان دي چې لسګونه غريب افغان کارګر يې واکمنو طالبانو له تېغه تېر کړي دي. خو د غام غریب افغان غم څوک خوري؟ بله خوا دا هماغه طالب مشران دي چې سلګونه طالبان يې همدغه ناټو ور وژلي دي، خو نن د طالبانو په شمول ټول سره په يو ميز ناست له هماغه چا په ګډه پروژې اخلي چې په اصطلاح طالبانو شکست ورکړی دی.
د افغان په خاوره د انسان په وينه د خړوبېدونکي تياتر دغه اړخ قصداً د بين المللي رسنيو او اجيرو سياسي ډلو لخوا پټېږي او داسې ښودل کېږي چې ګنې د افغانستان کشاله قومي، مذهبي او سمتي رنګ لري، پداسې حال کې چې د ځمکې پر مخ واقعيت بل شی دی. هغه واقعیت دا دی چې ملا، مولوي، جهادي، د ناټو قراردادي او انجوباز او سياستمدار ټول د پيسو د ګټلو، د خلکو په زبېښلو او د وطن د ملي شتمنۍ په چور او بهرنيانو ته په جاسوسۍ کې يو لاس، په يو اتفاق او د يو بادار تر امر لاندې کار کوي. افغانانو دا ټولې ډلې رد کړې دي او د دوی څخه خلاصون غواړي.